Seek Anta Joob

Won ko wonnoo ɗoo! Ina wona wonataa ko tinndol! Wonnoo ɗoo ko Farmata e Kummba, Farmata e Kummba koɗdi e galle gooto. Kamɓe njiidi baaba kono ɓe njiidaani yumma, Jibini Kummba ko Ayse kono ko Faati woni yuman Farmata.

Ɓe ngoniri noon haa Alla waɗi Faati, yummum Farmata sankii. Hankadi noon, Farmata wontii baayo. Dabbunde naatii, cammeeje e ñaayko ina ngari e ɓenndude. Colli mbaɗtii ɗe jippaade, ina ñaama. Oon sahaa joom ngesa fof nattii ɗaanaade haa weeta.

Yimɓe ngoni e dawde law ngam reende colli woto mbonnude ndemanteeri ndii Ayse, yummum Kummba, noddi ɓe kamɓe ɗiɗo. O wiyi yo Kummba yah reena ngesa ɓurba ɓadaade baa wuro ngoo.

Farmata kañum mo yummum sankii oo, yo yah to ngesa ɓurba woɗɗude baa.

Ɗoon e ɗoon miijo Farmata ruttii e neene mum birniiɗo oo, Faati. Gite makko mberlii gonɗi. Kono, tawde o suusaa salaade, tee kadi o alaa feere woɗnde nde o waɗata haa o waasa yahde, o jaggi e Alla, o jaɓi ko Ayse, mo jibinaani mo oo, haali koo. O dawi, o woni toon kanko tan, o alaa jeewtidiiɗo hay gooto Alla reeni en haa kikiiɗe les, gorko gooto, ɓiy laamɗo diiwaan oo, ina waɗɗii ndimaangu mum, ina wondi e maccuɓe mum, eɓe ndadda gerle, jaawle e lelli, ari tawi mo ɗoon O yiyi Farmata tan, miijo makko ari e resde mo. O ɓadii, o salmini mo. Farmata salmitii. Ɓiy laamɗo oo wiyi : « Hol to koɗ-ɗaa ? Hol jiɗnaaɓe maa ?

Farmata jaabii, haalani mo to jeyaa, haali gonɗo baaba mum.

Nde tawnoo ɓiy laamɗo oo yiyii ndii mbaadi e ndii nehdi Farmata, o fellitii hankadi resde mo.

O wiyi yo maccuɓe makko ɓee njahdu e Farmata, mbiya jiɗnaaɗo gorko oo, tuggi hannde, o resii Farmata… Diwaa ɗaa, ɗakaa ɗaa!